送中條例嘅始作俑者，係林鄭月娥、李家超同鄭若驊，但最終過唔過到，亦唔係佢哋決定，咁係邊個決定？冇錯——唔使爆粗住——就係一班立法會建制派。
如果話，去到呢一刻，最簡單可以推倒送中條例嘅，唔係由政府撤回，而係由立法會否決，咁政府也有下台階。即係話，只要立法會唔夠票，就好似當年23條咁，形勢自然逆轉。但歷史唔會重複，十六年前得，今日唔得，因為今日嘅建制派，無論係質素和智慧都大不如前，佢哋只係按個掣嘅機器(有啲仲要按錯)，我哋唔可以因為當年有人咁樣救過香港一次，就以為永遠都咁好彩。
支持議案嘅人，自然全部畀中共揸住痛處，但係如果我哋能夠揸住佢另一個痛處，咁有少許機會令佢哋倒戈——但就算唔倒戈，都要佢哋付出龐大嘅代價。情況就好似，中共扼住咗佢嘅右手，咁我哋要扼住佢嘅左腳，佢哋有能力嘅話，說服到中共撤回，就手腳並存，如果唔係，我哋至少要佢一隻腳，最好就一手一腳都扯斷埋，有乜理由畀佢哋安然無恙，全身而退？
你話要捉佢哋咁多人嘅痛腳，好難。係嘅，抵制佢哋嘅生意，難，因為抵制要好多人也要好長期先起到作用，而且佢哋好多生意都唔係靠香港人，佢哋簡直當你騷癢。你講票債票償，冇用，有DQ有種票，佢哋點都唔會輸晒，更何況好多功能組別議員根本唔使票。
不過，今時唔同往日。獨孤九劍教我哋，攻敵之必救，我哋不妨分析吓呢班人，乜係佢哋嘅必救？
首先我哋要認清楚，呢班人其實只係利益苟合之眾，除咗中共根正苗紅培養嘅民建聯工聯會，我肯定其他都只係為利益而口裏愛國。特別要留意，呢班人當中大半係功能組別，功能組別並唔係直選選出嚟，所以唔使講咩「香港人投票畀佢哋所以今日抵死」，冇人想投畀佢哋，係個制度令到呢班利益苟合之眾必然當選。
呢群人其實係支持修例嘅主力，冇佢哋支持，條例就過唔到。試諗吓，呢班人大部分來自商界，又係利益苟合而口裏愛國，所以呢班人一定有逃生門。點解佢哋嘅下一代唔驚送中？因為佢哋嘅下一代根本唔會喺香港生活。即係話，佢哋一家上上下下隨時全部攞外國護照，仔女全部喺外國讀書。呢一點，就係「敵之必救」。
我知道連登已經有人做緊，寫信去各國政府，要求取消呢班人嘅護照。呢一點真係最值得最值得支持，而且時機非常配合：
(1) 中美貿易戰，全世界離棄緊中國；
(2) 美英加歐已多次發表聲明反對逃犯條例修訂，視逃犯條例為對香港營商環境嘅迫害；
(3) 經過六九百萬大遊行，國際傳媒已知悉事件，背景清晰，唔使多解釋；
(4) 德國政府給予黃台仰李東昇政治庇護，即認同有香港人受政治迫害，結合(2)、(3)，整個西方國家都很易明白現在香港搞什麼。
所以，喺呢個時候，西方各國都會清楚，送中條例就係對香港人嘅政治迫害，而我哋正用盡一切方法去反抗，社會各界包括最保守的校長會、恩福堂、聖公會都發了聲，但係仲有一班拿着「民選」標籤嘅立法會議員，準備通過這次迫害香港人嘅修訂——記住，外國人唔了解香港嘅殘缺選舉制度，以為凡立法會議員皆是「民選」。
所以，嚟緊嘅日子，大家要全力廣發、聯署和支持連登仔嘅行動——全面要求各國文明政府取消這班支持修例嘅議員嘅外國護照，去信聯合國。甚至，還要做更多更多，抛磚引玉，如：
(1) CAP低各議員撐修例嘅言論、社交媒體資訊以及一直打壓香港人嘅記錄(例如翻譯葉劉「咁多師奶聯署一定係老公包二奶」)，SEND去美國和加拿大領事館，懇求撤銷佢哋及其家人嘅簽證；
(2) 懇求台灣將這班人列入黑名單，拒絕佢哋和家人入境；
(3) 再去信日本南韓，懇求唔畀呢班人及其家人入境日本；
(4) 懇求凍結佢哋嘅外國資產，或讓佢哋嘅資產回流香港或大陸，實現真正愛國愛港；
(5) 查清楚佢哋嘅仔女喺邊到讀書，去信那些學校，表達香港人被迫害嘅慘況，又或由呢啲外國學校嘅香港校友，發起校友聯署，指出香港人正受呢啲學生/校友嘅父母政治迫害。
大家集思廣益，各揮所長，盡力去做。記住，你唔使期望外國政府會即刻行動，但依家我肯定大半個西方國家都望實香港過唔過呢次修訂，只要有一個政府回你信答一句「Noted with thanks」，我肯定已經有人瀨尿。
當然名單唔止係立法會議員，仲有所有賣港官員，也可一併列入。
依家香港人就好似張翠山同殷素素，孩子張無忌在前，畀成班建制派連同滅絕師太林鄭圍住，迫死我哋仲要滿口正義，我哋大家唔自刎都會畀人隊死，但死前都要學殷素素同孩子講：「要認住這一班人，一個一個的認住！」唔單止孩子要認住，全世界文明國家都要認住呢班人，唔好畀佢哋踏入你哋嘅國界，沾污你哋嘅國土。
香港人畀呢班人整咗咁多年，呢個係最好嘅時機，還以顏色。我哋唔可以次次都畀佢哋全身而退，我哋香港人咁多年已付出咁大嘅代價，拼死也要還拖。
認同請分享，並全力支持後續行動。
沒有留言:
發佈留言